"Dat gote P" för de Schleswiger Speeldeel

Plattdüütsche Oscar för ehr Verdeensten üm Spraak un Kultur

(pb) Wenn een „Dat grote P" in‘t Gesicht steiht, warrn de mehrsten witt üm de Nees. Man, wenn een dat Speelbaas Uwe Petersen seggt, denn kriggt he dat grote Lüchten. Dat Zentrum för Nedderdüütsch (ZFN) in Leck harr besloten, den Pries – de all twee Johr utlöövt warrt – düt Johr an de Schleswiger Speeldeel e.V. to geven, för ehr verdeenstvulle Arbeit üm de plattdüütsche Spraak un Kultur.

In een lütt Fierstünn in‘t „Lütt Theoter" in Schleswig un in dat 50. Johr vun dat Bestahn vun de Bühn worr de Utteknung annerletzt övergeven. Helmut Wree, as Baas vun de Fördervereen ZFN, sä, dat de Schleswiger een grote Leistung för dat Plattdüütsche bröcht hebben. Nich blots, dat se op platt spelen, se bringt ok junge Lüüd an de plattdüütsche Spraak. He würdigte de grote ehrenamtliche Leistung vun de Bühn, mit se ehr 1.600 fördernde Mitgleeder un 10.000 Besöker jedet Johr. Landtagspräsident Torsten Geerdts müss sien Red op hoochdüütsch holen, man liekers hett he de Arbeit vun de Nedderdüütschen löövt un sä, dat sik de Kieler Politiker ok wieterhen stark mokt för de Spraak. Landrat Bogislav-Tessen von Gerlach hett de Grötens vun de Kreis Schleswig-Flensburg överbröcht un seggt, dat de Bühn in ehr 50. Johr verdeent utteknet worrn is.

Inge Brix un Klaus Nielsky vun de Bühn hebbt de Laudatio holen. Wat 1961 mal mit 16 Lüüd, de Theoter spelen wullt, anfungen hett, hett sik to een grote Vereen mit bannig veele aktive un fördernde Mitgleeder utwussen. Se vertellten man ok, wo swoor dat weer, jüchtenswo finanzielle Ünnerstütten to bekamen, Kreis un Stadt hebbt dormals „nee" seggt. Kort hier de wichtigsten geschichtlichen Statschoonen: De Bühn hett sik an de Amateurtheoterverband ansloten, 1993 kunnen se dat Huus in de Friedrichstraat köpen un mit veel Egenarbeit entstunn dat „Lütt Theoter". 2001 hebbt se den Kulturpries vun de Stadt kregen un 2009 worr de Kinner- un Jugendgrupp „Minispeeldeel" gründt. Ja, un de Familie Petersen is nu in de veerte Generatschoon in de Speeldeel aktiv.

Baas Uwe Petersen sä, dat de Nachricht to‘n Pries een Överraschen weer, man dat se insgeheem mal liesen daran dacht hebbt, wo schön dat wohl weer. Mit een Ogentwinkern to de längere, hoochdüütsche Festreed vun Torsten Geerdts sä he: „Op Platt geiht dat veel kötter un ehrlich – Velen Dank för den Pries! Ik verspreek ok, dat wi de plattdüütsche Spraak wieterhen fördern warrn un dat Geld, wat mit de Pries tohopenhangt, geiht an de Minispeeldeel."

De hett dann mit een lütte Stück ganz frie na „Raumschiff Enterprise" wiest, dat de Schleswiger op de rechte Patt sünd mit se ehr Jugendarbeit. För de musikalische Rahmen hett dat Duo „Vielsaitig" sorgt, de egens för düssen Abend plattdüütsche Leder instudeert harrn.